政治嘅嘢，一日都嫌多，球壇都一樣；車路士上周六輸畀史篤城，有傳領隊摩連奴快將落鑊被炒，但拖吓一日又一日，摩連奴到周三都未走，連接任大熱安察洛堤都讚摩連奴。形勢急轉，車仔球員梗係唔想得罪方丈，所以前隊醫伊娃同財經顧問男友周三舉行婚禮，一個現役車仔兵都冇現身，只係得前車仔門將舒華沙畀面出席。
得舊將舒華沙到賀
伊娃周三就同男友積遜喺倫敦聖柏德烈教堂舉行婚禮，以往做軍醫就着開運動裝，42歲嘅伊娃換上純白色Deep V婚紗，就梗係更加索啦，佢同老公仔勁恩愛，不時咀嘴畀傳媒影相㖭。伊娃𠵱家仲告緊摩連奴違反勞工法，大家可能喺法庭見，當然佢就冇請寸王出席，不過連其他車仔兵都冇蒲頭，似乎擔心被摩連奴秋後算賬，只有前車路士嘅舒華沙夠義氣，帶埋老婆出席婚禮。
講開伊娃同摩連奴嘅官司，車仔中場夏薩特就要做證人，呢位24歲比利時中場就真係左右做人難，不過唔緊要，佢大把後路，據《鏡報》報道，巴黎聖日耳門（PSG）已經準備好用8,000萬鎊（約9.4億港元）將佢由英超帶返去法甲㖭，仲話PSG都想買埋愛華頓前鋒盧卡古，夏薩特又多一位同胞照應，佢就唔怕喺法庭上篤死摩連奴啦。
肥安：摩佬唔會被炒
原本前皇馬教練安察洛堤，係車路士下任領隊大熱，周一佢就去基斯坦奴朗拿度喺倫敦搞嘅自傳式電影首映禮，似乎一心準備好上車，不過等吓又等，車仔亦都冇晒炒摩連奴嘅動靜。肥安亦都公開講：「我同車路士冇心病，如果我獲得邀請，我會好好考慮，但摩連奴唔會被炒，會方已經準備好留住佢，我認為呢個係最佳選擇。」
其實車路士唔炒摩連奴，因為唔係油王班主阿巴莫域治仲信佢，而係冇好嘅接班人，據goal.com報道，油王一早已經想炒佢，但因為接替人選：拜仁慕尼黑嘅哥迪奧拿同馬體會嘅施蒙尼，都唔可能係季中走人，而肥安亦都想放埋今季假期。如果搵軒迪克做替工，但佢教荷蘭國家隊又非常曳喎，冇好嘅人選之下，只好畀摩連奴繼續教落去。