為基金提供投票建議（proxy advisor）的獨立顧問ISS和Glass Lewis（GL），日前異口同聲呼籲電能（006）股東，反對電能和長建（1038）的合併方案。須知道ISS和GL在投資界甚有「江湖地位」，是真正服待專業投資者的獨立顧問，和受聘於電能的所謂「獨立」財顧百德能，其獨立程度自然不可同日而喻。
兩間顧問公司反對合併的理據，不外乎是長建提出的換股比率太低、交易採用「先合併、後派息」的結構，本身就對電能少數股東不公平。面對顧問一針見血的批評，電能如何反擊呢？第一，電能話自己的財顧百德能，用咗多達8種指標，去計算換股比率，同ISS基準唔同。但這解釋根本就是夾硬嚟，所謂8種指標，其實大部份都只係講緊同一件事：即偏重用盈利貢獻，忽略電能坐擁680億元現金、而長建卻是淨負債這重要因素。難怪GL會形容百德能的methodology，根本有誤導（misleading）之嫌。
至於「先合併、後派息」方面，電能的回應就更「妙」：派發特別股息，是必須先獲得電能少數股東批准的。這意味甚麼呢？即使今次的deal structure一開始就對電能股東唔公平，但都問咗你批唔批㗎喎？真係多謝晒！
長建最後會唔會加價？芬佬朋友說好難講。畢竟電能街貨既多且散（少數股東佔61%，只有一個基金持貨多於5%），以電能最近表現出來的態度，可能仍想「搏大霧」居多。長建早年全靠極低息環境，借平錢去歐洲shopping，買入穩定回報資產捽ROE。但隨着美國加息預期返黎，長建這個story，早就宣告玩完；反而電能持有的巨額現金，卻是會越來越值錢。如果否決交易，12個月後再嚟過，又有乜好怕喎！
電能小股東，唔好畀人睇死，唔好貪圖短利，向李澤鉅說不！
海迪