【羅徐聯婚】昨日「1111」好日子，還有《愛．回家》的「阿登」羅天池與大連女友徐佳在尖沙嘴千禧新世界酒店補擺二十七圍喜酒，楊明、徐榮、張達倫和鄭世豪做兄弟，廖碧兒、高海寧、薛家燕及陸駿光等到賀，曾傳羅天池向碧兒獻殷勤，碧兒解釋：「我哋係同期訓練班同學，當年我中文麻麻哋，佢喺溫哥華返，每個字都幫我繙譯，同佢屋企人都好熟。」
羅天池與徐佳兩年前已註冊，昨應記者要求連咀四次，徐佳戴住四對龍鳳鈪及一隻結婚戒指，問鑽戒有幾卡？天池說：「我呢啲窮鬼，係『心卡』有幾重就有幾多卡，要搏命搵食將來買隻勁啲。」問到愛的宣言？他說：「要對佢好啲，我哋ready好，太太鍾意女，想生兩個。」
採訪﹕黃曉妍
攝影﹕沈健程