咪睇呢兩張羊皮紙又黃又舊，全靠800年前寫上《大憲章》喺度，先慢慢發展成𠵱家「人人平等」法治精神。噚日起一連四日就有《大憲章》1217年修訂版喺香港蘇富比藝術空間展出，畀市民免費入場近距離望餐飽。
展覽朝早10點開場，展場限制最多25人入場。負責護送兩份珍本嚟香港嘅英國赫里福大教堂主教普林牧師（Chris Pullin）仲化身講古佬，帶領導賞團講解《大憲章》來龍去脈。在場參觀人士都聽得好留心，仲踴躍提問：「點解大教堂會有呢份《大憲章》副本」、「點解當年保存得咁好」、「點解寫喺羊皮紙」等。對住呢班「問題聽眾」，普林好有耐性解釋，仲讚參觀者反應好熱烈。
第一批入場參觀嘅鄧先生話，原本諗住嚟對《大憲章》致敬，點知參觀完後個心好感觸，「點解人哋800年前都有，我哋祖國都冇（平等法治）？」但佢慶幸香港仲有司法獨立。參觀嘅唔少係英國人，佢哋話喺英國嗰陣冇睇過《大憲章》，來港旅行反而撞啱呢個難得機會。