剛過去的禮拜日係立冬，中國傳統習俗有所謂「冬令進補」，估唔到連A股都好似打了補針，本周面對IPO重啟、數據唔「老黎」、通縮打到嚟，都冇腳軟。滬綜指昨升9點，收報3650。港股就美息當前軟晒，已連續五日扯白旗，昨跌49點，收報22352，高低波幅僅155點，傳統智慧話「十個牛皮九個淡」，又中！恒指只要守在雙底頸線22228之上，仍有機會雙底反彈。
A股硬淨，皆因市場思維往往反轉再反轉，越差越要救，壞消息變好消息！雖然A股有支持，外資卻連日減倉，滬股通已連續18日錄得淨流出，合共走資258億元人民幣。不過，又唔係冚辦爛外資都睇淡A股，趁高減持。10月以來，三大A股ETF都有增發，淨流入約50億元，睇嚟係短線與長線外資取態有別。
MSCI將於美國時間周四收市後（香港時間周五）宣佈中期檢討結果，預料部份在美國以ADR形式上市的中資科網股，將被納入新興市場指數及中國指數，或會構成資金技術性換馬，對騰訊（700）不利，而騰訊係恒指第二大權重股，有乜依郁會拖累恒指。
大跌市依然硬淨
息魔壓境，就算加幅有限，但包括人民幣在內的各種貨幣都有進一步貶值風險，現時買些高息股，係低風險之選，我近日就睇中永嘉（3322）。永嘉主要為adidas、Reebok、Umbro及Diadora等國際品牌生產運動服；又在中港兩地自營運動服零售及以D-Mop名義經營高級時裝零售。近年把大部份生產線搬去越南及柬埔寨，節省成本之餘，更受惠TPP太平洋自貿區協定。
集團2006年9月上市，之後年年賺錢兼派息，近年派息比率平均高於50%。人民幣貶值有利出口股，加上明年係奧運年，又係歐國盃年，對運動服飾需求勢增。此外，十三五提倡「健康中國」，北京取得2022年冬奧主辦權，在在利好。永嘉業績料保持雙位數增長，派息有增無減。
永嘉在7月兩千點大跌市中，係極少數跌唔落的股票，每當回至0.9元附近就有買盤收貨。8月尾公佈中期多賺7.1倍及派息增至4仙後，股價不斷破頂，上月中高見1.75元，之後回調整固，近日再度熱身。永嘉市值20億元，每股NAV近1.7元，持有淨現金6.5億元，相當於每股持有0.51元。昨收報1.61元，升2.5%，現價息率5厘，可逢低收集，首個目標1.75元。
割柑人
本欄逢周四刊出