光棍節商機無限！有人趁阿信屋噚日推出「689」折優惠，豪花萬二蚊，掃咗166盒、合共830片南韓水光針面膜，華華估計，嗰位豪客一係屋企有好多女人，如果唔係，日日敷一片，都可以用足兩年零三個月！
此款水光針面膜（5片裝），正價每盒120元、每片售24元。噚日客人到阿信屋購買可享6折優惠，折後每盒72元、每片售14.4元。客人買得夠瘋狂，最開心梗係老闆啦！CEO國際（759）阿信屋主席林偉駿話好滿意，「半日已經跑贏平時朝早到下午5點嘅生意」。
最搶手貨品並非零食，而係廚具、米糧與調味料、急凍肉類及麵食，例如大理石紋中鈔鑊、日清麻油同泰國米等。林偉駿發現顧客喺折扣優惠日出手闊綽，人均消費額由四、五十元增至百多元。