巴西中堅大衛雷斯又變「雪糕筒」，竟然被卡卡囝囝盧卡扭過！巴西今日就會鬥阿根廷，佢哋前日喺聖保羅集訓，重新入選「森巴軍團」嘅卡卡就帶埋囝囝、七歲嘅盧卡嚟，班球員都爭住同盧卡玩。
盧卡着住件10號波衫，推住個波，盤扭技術唔錯，幾有老竇當年爆到美斯食塵嘅風采，佢仲扭過大衛雷斯叔叔，搞到呢名全球第一身價後衞出醜。當然，雖然大衛雷斯間中都會失準，有時仲被人笑佢係「雪糕筒」，但相信呢次佢係特登放水，由得盧卡扭過佢，當𠱁吓小朋友。盧卡仲表演射門，射破由老竇把關嘅龍門；話唔定十幾年之後，卡卡同尼馬嘅囝囝會成為巴西前線嘅盧卡雙煞，因為尼馬囝囝咁啱又係叫盧卡。講開尼馬，佢呢排喺巴塞隆拿踢到曉飛，甚至令人覺得佢夠晒班頂美斯個位，巴西兼巴塞名宿李華度就話尼馬係𠵱家世界最好嘅球員，可以贏得今屆金球獎。