仲有個零星期就係區選投票日，同過往一樣，泛民重點部署嘅選區、特別係擬明年參選立法會嘅人士，一律被狙擊，當中唔少係受有泛民背景同建制候選人左右夾擊。但有心水清嘅政界中人同花生友分析，建制今次某程度上放生咗一個泛民，就係民主黨涂謹申，但唔係好心，而係陰濕。
同係立法會超級議員，民主黨何俊仁同民協馮檢基今屆選情嚴峻，前者出選屯門樂翠，計埋佢有6個候選人，主要對手當然係有建制力撐嘅前律師會會長何君堯，但前民主黨員阮偉忠、熱血公民鄭松泰亦加入𠝹票，加上有阮偉忠、沈錦添同張永偉殺入混戰，形勢好危。
出選深水埗麗閣嘅馮檢基一樣，除咗要同獲民建聯、工聯會聯手撐嘅小花陳穎欣正面交鋒，前黨友兼該區前議員黃仲棋亦忽然參選，一左一右㩒住打，似乎要將民協老巢連根拔起咁。
反觀阿涂，對手係報稱獨立嘅高曉榮，佢係重慶市政協，但在建制陣營算寂寂無聞，又冇乜參政經驗，有泛民中人話，相比何、馮嘅大堆頭「待遇」，簡單形同半放生，但千祈咪以為建制派真係咁好心，據知佢哋亦盤算到，明年立法會選舉如果何俊仁唔選，民主黨派個第二梯隊出戰，阿涂話晒從政多年有號召力，分分鐘吸晒大部份泛民票，屆時兩席隨時輸剩一席，建制就坐享漁人之利，多取一席。
花生友卻認為，話晒係隱形建制，連啲票都隱形唔見光，而且搶多一個區選位兼砌低大佬，邊個唔想？所以泛民支持者聽完笑一笑之餘，千祈唔好掉以輕心，誤以為心儀人選贏梗而唔去投票呀。
花生友
周二、四刊出