民建聯鍾樹根被揭選舉海報連自己英文名都印錯，Chris變Chirs，俾網民笑到面黃，Tree根噚日喺立法會開會，再被問到有關事件時，表現得十分嬲嬲豬，怒指係製作公司出錯，一定會追究責任。
民建聯主席李慧琼話，該黨之前喺海報製作過程，都發現咗個好離譜嘅錯誤，好彩及時發現。乜嘢咁離譜？原來製作公司喺民記傳單上，誤將「新社聯」印成「社民聯」，嘩人哋容乜易睇錯係「社民連」？
李慧琼話，Tree根其實已校對過張海報第一同第二稿，當時都冇出錯，點知最後一稿出事，覺得成件事對Tree根好唔公平，民記嚟緊會檢視宣傳品製作程序，但冇回應會否因此更換製作公司。
鍾樹根今屆區選喺東區漁灣爭取連任，對手有徐子見；李慧琼爭冧莊嘅九龍城土瓜灣北，對手有林依麗及沈泰鋒。