台灣名模林志玲早前受台灣賣淫花名冊慘被牽連，加上疑為跨國賣淫集團首腦戴君儀話幫佢接過飯局，令林志玲都忍唔住嗌嬲。噚日有台灣雜誌又爆料，指一名自稱係竹聯幫大哥「順哥」嘅人，透過親弟江奕宸話當年林志玲喺美國拉斯維加斯表演時，就曾經被人透過美國黑幫設局逼志玲去富豪飯局，最後係順哥出手解圍。
被困旅館
當年在場嘅向華強太太陳嵐噚日接受電話訪問時，就還原番件事出嚟，佢話：「當時志偉、小春都幫我搞嘅騷表演，有一日林志玲經理人洪偉明打電話嚟搵我求助，同時間佢都搵咗寬姐邱瓈寬幫手，最後寬姐出手解決咗件事，事後林志玲仲幫我個騷做頒獎嘉賓。」據知，當時是有一名內地富商透過戴君儀想結識林志玲，林志玲被騙去拉斯維加斯後被禁錮喺一間旅館入面，連經理人都聯絡唔到佢。洪偉明求救無門惟有搵向太同寬姐求助，最後有指戴君儀仲要跪地認錯寫悔過書。而該名富商事後向各人致歉，話諗唔到中間人會禁錮對方，寬姐截稿前就未有回覆本報查詢。