一年一度毅行者即將舉行，籌委會主席陳智思噚日出席記者會時就話，今年再次出動人情牌，邀請喺商界嘅好友參與，前財爺梁錦松同埋港視（1137）主席王維基已經答應出席，佢笑住話，希望佢哋畀畀面、唔好甩底喎。
陳智思話自從受過傷，已經十幾年無玩，今次將會同商界朋友一齊參與全程8公里嘅「領袖行」。至於佢啲員工，陳智思話佢哋都已經「自動波」，唔使問都報咗名啦！
其實陳智思都參加過四屆半毅行者㗎，點解係「四屆半」？陳智思話當年仲做緊立法會，原本打算籌組議員隊參加，點知畀人甩晒底，得返佢同梁耀忠，惟有一人行一半，各自行咗50公里囉。
今年毅行者將會喺下周五至日（20至22日）舉行，有1,300支隊伍，參加者要喺48小時內走畢100公里路程，籌款目標3,200萬元。