各位單身巴絲打，11月11號乃「光棍節」。以往嘅獨男剩女，只會飲酒狂歡聯聯誼，又或者參加相親活動嚟慶祝，但自09年開始，「光棍節」變成狂歡網購節，此風更由中國滲透到台灣、日本，甚至演變成全球購物新模式，總之就雙11大減價啦！
即將開棟篤笑，「個樣好單身」嘅卓韻芝，表示一直有跟開呢個節日：「因為我本人真係單身，都係光棍。」被問到應該點慶祝時，佢話：「應該今日唔好返工，去做鍾意做嘅嘢，去尋愛啦！仲要掛個「光」字牌喺心口，等你知道佢哋單身，可以主動結識。」而美棋BB就認為，「光棍節」應該自己一個行出街，同其他一條冷嘅人Say hi。
動主播Gi同斌斌走到街上，發現Single或已unavailable嘅大家，被問到應該點去慶祝「光棍節」時，都話…
Wilson：我唔覺有咩值得慶祝。
梁先生：唔應該慶祝，因為好侮辱單身男仔，好似我咁！
何先生：唔會慶祝，我唔覺得有咩值得開心。
姊妹花Hanna及Abby：今日係「雙棍節」？哎喲「光棍節」哈哈哈…我哋覺得冇乜特別，唔會慶祝！
鄧先生：我唔係單身，所以唔使慶祝，就算單身都唔應該慶祝，因為唔係一個好嘅節日。
陳小姐：我覺得件事好商業活動，借呢個節日去推銷。
丘小姐：我結咗婚，唔知有乜好慶祝，就算單身，我覺得都冇乜特別。
阿強：冇咩好慶祝(講咗兩次)，正常日子啫。
陳同學：應該唔會慶祝嘅，因為冇咩要慶祝。
黃先生：冇乜好慶祝，哈哈哈…
咁如果要為「光棍節」挑選一位代表人物，應該係邊個呢又？
卓韻芝：唐僧太正，佢就係「光棍節」嘅Icon，修心養性，就當係心性嘅訓練！
美棋BB：我揀馬國明，因為其實我有啲鍾意佢，佢個呆樣係好襯雙11。
Wilson：我會揀唐僧，直覺覺得佢係代表性人物。
梁先生：我揀唐僧，因為佢冇女朋友。
何先生：唐僧啦，佢真係一個人嘛！
姊妹花Hanna及Abby：我哋會揀馬國明，因為佢係筍盤，而我哋又單身。
鄧先生：我會揀馬國明，因為佢形象正面。
丘小姐：代表人物我揀馬雲，因為我認識「光棍節」係因為淘寶，哈哈哈…
阿強：唐僧，冇辦法，出家人肯定係光棍。
陳同學：應該係唐僧，佢應該少同女仔接觸。
黃先生：阿源，佢覺得自己得零，仲唔光棍吖！