隔咗十年，去年重新舉辦嘅亞洲玩具展，深受Kidults歡迎，下個月又捲土重來！
為咗同冇玩具嘅小朋友分享快樂，今屆玩具展特別同YMCA轄下嘅「玩具銀行」合作搞捐贈活動，入場市民每捐出一份玩具，就可獲一張PlayStation 50蚊現金券，可即時喺場內相關攤位購物；機構會將禮物送畀東涌、長沙灣區內嘅低收入家庭兒童。主辦單位話，𠵱家好多小朋友啲玩具，玩一兩次就唔要，所以希望藉此推廣「施比受更有福」。
名為Toysoul嘅第二屆亞洲玩具展，將會喺12月18至20日假九龍灣國際展貿中心星匯同地下展覽廳舉行，門票港幣28蚊。入場人士更可免費抽懷舊閃卡一次，憑票尾可以喺場內扭蛋、夾公仔等。參展商PlayStation仲話，玩具展攤位設有65個試玩台，畀玩家過手癮。