下周六(21日)的三項國際賽預賽的參賽馬名單，日前已公佈，一如所料冇外隊馬參加。馬會一哩錦標，莫雷拉重掌馬王黑衣巨人「步步友」帥權，因此「詠彩繽紛」重配上季合作贏過兩場的羅理雅，而「包裝奔馳」將續配潘頓，增程初跑一哩，向上述兩大勁旅挑機，肯定係全日焦點所在。
至於愛爾蘭籍騎師郭能，就算馬會一哩錦標有座騎，但睇怕面對「步步友」、「詠彩繽紛」，都係得過跑字。不過佢喺2000米馬會盃和1200米馬會短途錦標，均有惡馬在手，贏得大賽孖寶，絕不出奇。
郭能在馬會短途錦標，將會再騎大摩的「新力風」，由於本港最佳短途馬「友瑩格」上仗心律不正常兼氣管內多血大敗，現正休養，「新力風」少咗匹勁敵，機會當然提升。
馬會盃方面，郭能更加有馬揀，上屆佢夥拍「將男」爆半冷捧盃，但上月底沙田錦標郭能捨棄「將男」，改策另一匹老拍檔「美麗大師」，結果獲亞軍，今次兩駒再度同場，郭能又再左右做人難，要做個艱難之決定。他說：「馬會盃我會騎番『將男』，始終佢係我香港策騎生涯中，最重要嘅一匹馬，曾經攜手奪得遮打盃及女皇盃，我唔想再放手，加上經過上場熱身後，佢嘅狀態明顯進步，絕對有勝算。」
至於「美麗大師」會由巫斯義執韁，同場另一廐侶「喜蓮巨星」則配韋達。