噚日光棍節，屬單身人士節日，立法會內單身議員唔多，佢哋點過？自言「嫁咗畀香港」嘅民主黨主席劉慧卿就寄情工作，卿姐話好享受單身生活，事關佢覺得一個人返到屋企，做咩都得，又唔使顧住招呼另一半。咁悶唔悶呢？卿姐話佢日日都要做立法會嘅工作，唔係開會就要睇文件、處理市民求助、招呼訪客同傳媒，「做完晒都唞唔到氣」，仲邊有時間悶呀？
同樣單身嘅工聯會麥美娟（圖），雖然忙於工作，但都上淘寶買嘢應節，但唔係買畀自己，而係買畀姪女。麥美娟同屋企人住，仲有兩位「公主」、即係佢兩隻狗陪住，相當熱鬧。查實幾年前仲係候任特首嘅梁振英，聲言介紹男士畀麥美娟識。結果係點？咪同取消強積金對沖一樣走數囉！