練馬師徐雨石這晚連場搏殺，若然唔係第三場「上浦勇將」追唔切做二奶，佢連同頭兩場分別勝出「野外桃源」及「及時取勝」在內，頭三場已經可以連中三元。不過這絕不代表徐雨石攻勢已完，第四場四班一哩佢繼續出擊，後備補上馬「皇龍大師」在柏寶胯下貼欄一放到底，影相僅勝大熱門「凱倫之寶」，爆出12倍綠燈WIN，既幫徐雨石今季首次一日三捷，亦助落飛黨從呢匹冷門身份勁收數百萬獨贏彩金。組合獨贏跑到第四場終於唔係開A2，呢場開出A3，派彩43.5元。
曾志偉老友區啟光的愛駒「皇龍大師」同柏寶堪稱夢幻組合，人馬跨季近七次合作奪三冠兩亞一季。反觀食店京林屋的美女總廚Helen Tang丈夫李澄曜的愛駒「凱倫之寶」極冇運，此駒與雷神重逢，末段一度塞車，望空後再追為時已晚，給「皇龍大師」走甩，縱追得極勁，仍輸馬鼻位只得第二，如跑多一步已過晒。三、四名則分別係「魅力漢子」及「金叻星」，四重彩派一萬三千幾。