歐國盃決賽周仲有八個月先展開，新科世界盃冠軍德國，骨幹陣容仍然當打，加上大賽專家本色，成為大熱門真係好合理；有能力同德國抗衡真係寥寥無幾，小弟愛隊法國都叫人才輩出，加上主場之利，希望同德國有得鬥下。
講青訓能力，法國真係唔輸蝕畀德國、西班牙呢啲名牌好多，明年決賽周骨幹陣容，保羅普巴22歲、基沙文24歲、華拉尼22歲，仲有新星安東尼馬迪爾同京士利高文都仲係19歲，真係大把世界。不過法國最大嘅對手唔係敵人，反而就係自己；法國內訌嘅新聞其實同荷蘭不遑多讓，早喺82年世界盃已經出現「泰利勾義嫂」事件，傳聞聖伊天中場拉里奧斯搞柏天尼老婆，結果賽前就被逐出隊。2010年世界盃安歷卡、艾拉帶頭反教練杜明尼治，更加成為球壇笑柄；到𠵱家都仲有拿斯尼對法國隊抱怨。
法國人出名自大，要同人合作真係有啲難；坦白講論資歷，拜仁慕尼黑中場列貝利（圖）都算得上係國家隊大佬，06年已經同施丹攜手殺入世界盃決賽，但之後由佢孭飛，獨食風格不改，個人亦欠領袖魅力，甚至已達球霸級地位。一粒老鼠屎可以整臭成煲粥，雖然列貝利今季仲未復出，而且佢亦都有退出國家隊念頭，但法國國家隊竟然唔批准，小弟真係擔心受到廣告商等壓力，法國下年又搵番佢嚟擔大旗，白白浪費咗辛苦建立嘅新王朝，迪甘斯真係要三思呀。
文：牽牛