近年有意見批評，處理醫生失德過程好慢兼冇透明度，另海外醫生想嚟香港執業又好難！呢兩大問題，都掌控喺醫務委員會手上。
自由黨立法會議員張宇人（圖）有見及此，出手整頓醫委會，將提出私人條例草案，建議醫委會非醫生成員由4名加到8名，24名醫生委員份額唔變，希望「戥勻」意見，以免「醫醫相衞」，佢強調條例只涉及人數變動，唔會加入輸入海外醫生等實際建議。
張宇人嘅女兒同女婿，都係美國執業醫生喎，唔怕俾人話有利益衝突咩？張宇人強調預咗有人咁講啦，澄清同兩人係咪返港執業完全無關，仲話「黃傘(運動)後，佢哋都唔熱衷返嚟」，但稍後發言時會申報利益免麻煩。
而草案有機會喺地區同功能組別同時獲通過，皆因唔少黨派如民建聯、民主黨、工聯會等都話原則上支持，覺得改革醫委會與時並進係好事！張宇人則引述梁振英對輸入海外醫生反應正面，反而本身係醫生、主責嘅食衞局局長高永文冇乜積極回應。