「寧願沒擁抱共你可到老……任由你……」
「老媽子呀，都過咗N年啦，仲日日播呢首歌，今日同你上山頂係諗住同你輕鬆吓，唔係畀你感懷身世……」君好同一般Auntie一樣，最鍾意緬懷以前多仔媾嘅風光歲月。
君好再㩒Play掣，iPhone又傳出那首老掉牙嘅洗腦歌，當歌播到「如若碰到他比我好……」時，突然「呢首歌，好好聽……」，傳來一個阿伯嘅聲音，一把彷彿好熟悉、聽咗好多年嘅聲音。此時，眼仔矇矇嘅佢，抬起頭，谷淚光說：「呢首歌，講緊我。」
八萬五陰霾 今日重現
君好感覺到阿伯企喺佢身旁，阿伯問：「似乎你，都有過一段刻骨銘心嘅愛情故事？」「要數到97年啦，本來我同老公好哋哋，一家四口，有幾叠樓。」「咁咪幾好，而家樓價高過97時好多啦！」「先生，你梗係冇留意歌詞，歌詞話『說太多話我想說 但我 還是要啞口道別』。」「層樓喺八萬五災難之後，就逼住要賣填數，我老公冇幾耐，仲過身……」君好感覺到，聽到呢度時，欄桿有啲微震，應該係因為阿伯手震，「你真係好愛你先生」。
「你誤會啦，歌詞講表達緊，我對幾層樓嘅思念。你知唔知，如果層樓喺我手，係值6,000幾萬呀！所以只可以得閒上嚟呢度，望返我以前買過嘅地方。每次上嚟，都覺得佢哋同我講，快啲買返我啦，快啲帶我走啦，可惜……」君好輕按iPhone，首歌又重新播過。「聽 你不斷呼叫我 劃破 寧靜我的心下墮 在難過 講不出愛沒結果 口和唇 緊緊閉鎖」。
「咁你都有兩個仔女呀，出晒身咪可以再置業。」「托賴啦，佢哋都算生性，最近都諗住夾份買層300萬樓一齊住，170呎」「一家三口，170呎點住呀？」君好聽得出，阿伯應該非富則貴，「係好細呀，今時今日，有170呎都好過租樓幫人供啦。」「唔緊要，我一定會令你住得更有尊嚴！」阿伯講呢句話時語氣，就好似覺到好痛心咁。「好呀，多謝你，如果你係有權有勢，咁我買唔買到樓，真係要靠晒你啦！」「我要走啦，你信我！」阿伯走咗後，君好突然記起呢把熟悉嘅聲音，唔係初哥哥，唔係禮信，而係董……
「媽子，你做乜發晒呆呀！」「我啱啱遇到個人，仲同佢講『靠晒佢』，如果佢真係做嘢，香港大鑊，真係好大鑊！」「你講乜呀？是但啦，媽子，你想唔想睇新上演嗰套《十月初五》呀？」「唔睇啦。」「你唔係好鍾意套劇？」「劇本幾好都好，但拍嗰個係葉大導喎，正如樓市出乜招都好，搞嗰個如果係董伯伯。」
另一邊廂，董伯伯亦叫助手，幫佢搵一首歌，播到呢兩句歌詞，佢跟住唱：「哭 也一話都不說 害怕 連累你一生日月 憾無缺 只差跟你曾遇過 給過你 太多波折。」
的確，香港真係太多波折了……
千頌C
http://fb.com/winbigwok
本欄隔周三刊出