本港上市公司拓展海外業務嘅眼界真係越來越廣闊，繼有上市公司走去韓國濟州、塞班島、非洲、瓦努阿圖開展酒店、賭場等娛樂設施，領航（399）近日宣佈，初步傾緊投資一個位於保加利亞嘅度假村。
近呢兩年，唔少上市公司走去海外搞娛樂度假村，好似博華太平洋（1076）喺塞班島有個度假村項目，澳門勵駿（1680）又話同非洲佛得角共和國簽訂協議，計劃喺佛得角首都建成一個綜合消閒旅遊娛樂項目。藍鼎（582）就投資咗個濟州娛樂場。
新近呢間領航話去保加利亞投資，初步傾緊可能成立合資公司或收購當地一個度假村，裏面包括有酒店、高爾夫球場同住宅物業。保加利亞喺希臘旁邊，出名出產玫瑰花，跟女友去呢度度假，一定要送花喇。