每屆區選都有唔少參選人報稱獨立，但查實都同建制派有千絲萬縷關係，有網民將獨立參選人大起底，以便選民認清真假獨立，但有時都會「殺錯良民」！
好似參選東區翠德選區候選人李健恆（圖）就因為同左派組織「香港新動力」前主席「李健恒」撞名，一度被誤會。佢雖然冇政黨背景，但本身係會計師，獲泛民陣營嘅立法會會計界代表梁繼昌同公民黨黎志強支持，自言睇唔過眼區議會被建制把持。
原來獲工聯會及民建聯力撐、喺深水埗麗閣硬撼民協馮檢基嘅小花陳穎欣，同李健恆係書友仔，皆因二人讀法律時係同屆同學，李強調，讀書時唔識對方，估唔到咁啱同年參選區議會，但政治立場上，明顯人各有志。