久休的林雅詩（Grace）宣佈復出並推出寫真集後，隨即爆出12年婚姻瀕臨離婚邊緣，其後多次傳出她手腕受傷疑似自殘。昨日有周刊指日前她接受潘紹聰主持的網上節目《恐怖在線》訪問時，自爆老公收藏大量佛牌，和類似動物乾屍，當中更有靈異事件影響她媽咪和兒子。
事實上Grace在2013年曾經在微博上留言，當時她聲稱朋友的丈夫因為收藏佛牌而令性情大變，今次她在訪問中，間接承認當時所寫的是她自己：「嗰陣我拎過啲佛牌畀我媽咪，點知媽咪之後發燒、又暈又嘔，搞到佢真係好辛苦，我搵咗個師傅去佢屋企做咗場好大嘅法事，我好內疚，點知師傅返到我屋企，仲大鑊！師傅話間屋樓上差唔多有15、16隻（鬼），仲積聚晒喺我間房。」
她續說：「嗰陣我個仔成日都發噩夢，半夜又會突然扎醒，初初都冇為意，跟住佢同婆婆講話見到屋企有人成日哄住佢，但係又唔見到個樣，之後師傅叫我清理晒屋企所有嘢，仲話原來我哋一直喺度拜緊鬼。」
內疚累及媽咪同囝囝
Grace亦稱當時與老公經常為這件事嗌交，問到會否因此令婚姻出問題？她說：「其實我唔知有冇影響，人哋覺得我好似黐線，做埋啲無聊嘢，但係我個人會好down，成日喊，發脾氣會唔開心，有啲嘢控制唔到，好多嘢都諗唔明。」再問有否與丈夫坐低傾？Grace坦言：「講親呢啲嘢都會落閘放狗，佢好保護同相信呢啲，有時仲鬧個仔唔可以亂講，如果我講嘅話，反應仲大，直頭會兇我。」她還說：「佢越拜我哋夫妻關係越嚟越差，問佢乜嘢都唔肯講，我都怕俾佢落降頭，不過我都會搵啲有宗教信仰嘅朋友傾吓偈。」
昨日再向Grace了解此事，她只說：「每個人都有唔同嘅信仰，正路嘅冇問題，我係唔會干涉，但係我同阿仔都有見到，始終阿仔仲細，我唔想嚇親佢，所以點都要保護小朋友。」
採訪、攝影：唐琛悠、梁繼光
