大家都知道港鐵（066）主席錢果豐做到今年底就拜拜，交由馬時亨擔任港鐵主席，估唔到錢果豐𠵱家連九龍倉（004）獨立非執董都話唔做，又係做到今年底就走。
唔講唔知，原來63歲嘅錢果豐喺港鐵同九倉都做咗好多年董事，佢2002年已經擔任九倉獨董，至今有13年咁耐，九倉話佢因為有其他事務而決定辭任董事職務。港鐵就更耐，佢1998年加入成為董事局成員，做主席都有12年。
其實錢果豐喺財金界一向比較低調，每年主要喺港鐵一年一度嘅股東會亮相，或者港鐵有重大事情，先至見到佢蹤影。
除咗港鐵與九倉，佢𠵱家仲係華潤電力（836）與恒生銀行（011）嘅獨董，唔知佢遲吓會否辭埋呢兩間公司嘅董事職位，舒服嘆世界呢？