癡根都可以連任的區議會生態，比石牆老樹更危，選民比路政署早着先機的話，應該移除癡根！
可惜區選投票低到離譜，有當選人只得百幾票，都可以贏！而號稱全港人口中身家最厚的灣仔區，投票率一向弱雞。闊佬和超級中產，唔理後街爆屎渠，唔吼蛇齋餅糭，唔怕TSA（仔女念國際學校），唔慌老來無「全民退保」（因為打嗰份工，是跟天堂預留了位的林鄭同一個部門！）是以，冇feel投票！就算投，唔會投給泛民！區民自豪於高薪高學歷，一場雨傘運動，令灣仔有錢人出入不便，阻住人……發達喎，沒有最發，只有更發。灣仔區一直紅噹噹，收傘後必然更紅、更紫！如果區選在去年舉行，泛民和傘兵想搶攻灣仔，預咗捱比警棍更冷酷的重創。
神奇在，今次區選灣仔有港豬挑戰紅色建制，儍得矚目！灣仔是市區中的林村天安門，難打極。但假如七萬幾選民中的青壯族出來投票，局面難料，喜帖街都能打低囍歡里啊，灣仔不是姓侯鄉紳的地盤嘛。一於從撼動灣仔開始，趕絕鰂魚涌廢墩避雨亭，將癡根斬件送去堆填，一桶專棄，處決區會廢柴！被梁班子貶做廢青的，趁禮賓府種米後積極種票前，出手啦，無得輸！