近年好多女士成為馬主，除咗睇愛駒出賽，部份仲好坦白，會小賭怡情玩埋一份。
「我每一次賽事，都會投注自己嗰隻馬啦當然！」佢就係「悅欣賞」嘅靚太馬主曾向欣，呢匹馬上次被外界睇淡成為冷門，結果沿途狂放，最後捱得一席季軍，欣欣滿唔滿意呢？她說：「上次排十一檔啦，最後都追到第三，真係好驚喜呀。」當晚「悅欣賞」嘅位置派彩有4.2倍，的確係一個驚喜，呢匹馬將喺今個禮拜三晚再跑，改配見習騎師黃皓楠，會唔會再有驚喜呢？
曾向欣說：「今次排到5檔，所以我對星期三賽事都抱有好大期望，因為已經轉咗好運，之前好多次都排外檔，好耐未試過可以攞到一至五檔。」
欣欣最欣的確行運，日前佢同丈夫去Ball，抽獎抽到一支靚紅酒，由馬會主席葉錫安負責頒獎，欣欣表示希望把好運帶給「悅欣賞」，攞到好成績。
講完馬就講吓欣欣本身，佢爸爸曾炳威做消防生意，欣欣家陣最主要嘅工作，係湊兩個寶貝女，欣欣除咗「悅欣賞」，另有一匹愛駒「無限欣賞」，未來亦會不斷引更多馬匹，但欣欣自己會唔會追番個仔呢？「照顧兩個女已經用咗我好多時間，暫時不考慮再生小朋友，而且仔女我都冇乜所謂，有兩個女已經好滿足！」