如果黃修平導演的《狂舞派》，是對夢想不離不棄的追逐，他的新作《哪一天我們會飛》可看作《狂》片的前傳，看到夢想是如何孕育成長。《哪》片中三位年輕演員蘇麗珊、吳肇軒及游學修青澀真摰的演出，令人發現青春是可以如此揮霍。讓人懷緬中學時期，各人都想有一部時光機，解決當時最大的遺憾。
撰文：譚倩宜
電影《哪一天我們會飛》戲中三位90後演員蘇麗珊、游學修及吳肇軒，為現正上映的電影接受本報訪問，電影觸及不少香港教育問題，追逐夢想與學生追求分數升學之間的矛盾，剛畢業的他們應該感受最深。
中學時就讀band1學校的蘇麗珊，對香港教學制度向來只着重分數一事認同不已，她指身邊的同學都是為讀書而讀書，完全沒有生活：「佢哋只會努力上堂，完全唔參加課外活動，明白升學係要靠讀書，但係咪仲可以有其他事物追隨呢？如果唔係將來有啲事可能冇機會再做。」游學修亦指曾因分數問題，而被老師要求退出其喜愛的足球隊轉到泳隊，但他說：「我游水根本拎唔到獎，佢只係拎我嚟攞參與分，當時個老師仲同我講，如果我退出泳隊，將來唔夠分升原校唔好求佢，結果佢真係收咗兩個比我低分嘅，令我冇得讀番原校。」
面對香港教育制度的弊病，蘇麗珊跟吳肇軒坦言也曾希望到外地留學，蘇麗珊說：「人哋求學唔係求分數，我去過美國讀戲劇，最深體會係，佢哋好着重同你溝通，會睇吓你係咪真係明，我諗番喺香港讀書嗰陣，其實有好多都唔明，只係為拎分而背書。」
在旁的吳肇軒則指香港的教權比外國重，才令學生地位下降：「我覺得大學入面始終係個學術討論嘅地方，有時教權唔應該擺得太重，咁學生地位亦會提升番，呢方面外國比香港行得前，好多人都話外國讀書free啲，自己冇去過外國留學，所以都好想證實一吓係咪咁。」
曾到意大利修讀電影的游學修，亦指外國的教學模式比香港好，但他覺得自己是個土生土長的香港仔，所以仍希望在自己的家發展及學習，他說：「如果佢制度有問題，你可以喺呢個框架內靈活變通，又或者你有能力嘅，就去改變呢個制度。」
想與同學拍拖
每人一生中總有一兩件遺憾事，問到三人求學時期的遺憾？蘇麗珊笑說：「我冇同同學拍過拖。我覺得呢種感覺好sweet，又可以一齊返學，放學又可以睇佢打籃球，一齊溫書，不過可能我中學時太男仔頭所以冇人追。」吳肇軒則笑指自己最遺憾的是追不到同年的女同學，令他要跟師妹拍拖：「當時自己有打排球，每次打完排球之後，就會收到一啲師妹喺內聯網send嚟嘅情信。」
游學修則表示仍記得當年曾於課堂上，被老師不禮貌對待，他說：「最遺憾係當年老師掉我粉筆，我冇出手還擊，如果我有時光機，我第一時間係返去當時，打番個老師一拳，因為我覺得自己冇做錯，係合理自衞。」
場地：E-Max
服裝：point studio（蘇麗珊）
化妝：Yvonne Yeung
夢想救地球
電影《哪一天我們會飛》內不時提及夢想，蘇麗珊表示看過很多環境污染的新聞，夢想拯救地球。為實現夢想，她大學時修讀環保科技，之後才發現夢想說易行難：「政府想做家居垃圾收費好耐，但到現階段仍然係諮詢，好多事可以做得更好。」游學修直言人只得一生幾十年時間，故其夢想是希望過着不平凡的生活：「演員呢個行業對實現我個夢想係好好，可以體驗到唔同嘅生活。」吳肇軒則指自己並沒設定明確夢想，只是希望可以自由生活，做自己喜歡的事。
至於提到蘇麗珊早前憑《哪》片入圍台灣金馬獎新演員，她坦言對奪獎並無信心：「我有睇其他對手嘅作品，我非常欣賞佢哋，自己入圍已經非常驚訝，因為真係冇諗過，𠵱家腦入面諗嘅事就係希望行紅地毯時唔好仆親。」
