英格蘭喺周五會作客西班牙踢友誼賽，但係三獅軍團嘅隊長朗尼就似乎一啲都唔緊張，喺周一仲有心情去現場睇摔角電視節目《WWE Raw》；佢仲一巴摑到WWE摔角手巴列特瞓低，真係唔踢波都可以考慮轉做摔角手。
不滿插水挑釁
眾所周知，英格蘭兼曼聯隊長朗尼一直都好鍾意打拳同摔角等搏擊運動；佢喺周一仲帶埋囝囝佳仔，同傑斯、費查一齊出席摔角電視節目《WWE Raw》嘅現場錄影；但咁啱身為普雷斯頓球迷、又好不滿朗尼喺上季英足盃插水，搞到愛隊被淘汰嘅巴列特都喺現場。
仇人見面，自然份外眼紅，巴列特喺台上見到朗尼已經忍唔住出言挑釁話：「我真係覺得佳仔好可憐，成日都要見到自己老竇失敗，因為你每次喺球場上嘅表現都差到不得了。」之後仲行埋去，搵手指篤住佢心口嚟鬧。
其實巴列特成6呎7吋高，比起5呎9吋嘅朗尼差唔多高咗成個頭，見到佢來勢洶洶咁衝埋自己度，都咪話唔得人驚；但當所有人都以為巴列特用一隻手指都可以篤死朗尼嗰陣，朗尼就開始反擊喇，唔知係咪為咗要喺囝囝面前威番次，佢突然一巴摑落巴列特度，仲搞到巴列特即刻瞓低㖭。
疑為搶收視做Show
有知情人士透露，班去睇摔角嘅觀眾好鐘意呢個情景，而朗尼都樂在其中；成件事咁峯迴路轉，都唔知係咪攝制組見到朗尼之前同史篤城後衞巴士利扮打拳，吸引到好多人留意，今次就要求佢同巴列特夾埋做場戲，幫個節目谷收視。
但講到收視，曼聯自己都唔多掂喇；據英國BBC公佈，曼聯贏利物浦嗰場聯賽嘅收視率，仲少過由曼聯「五小福」做班主嘅沙福特城，佢哋上周五贏諾士郡場足總盃嘅收睇人次，仲要多雙紅會90萬人次。