眨吓眼11月中，今季初抵港，打算出爭明年香港打吡大賽的優質自購馬，正陸續試閘備戰或安排上陣熱身。
其中大摩馬房賽績極佳，評分高達89分嘅「明月千里」，這日參加第一組1000米草閘，都好大陣仗，出試前後大摩一直傍喺身邊外，馬主亦同幾位朋友到場監督，並由大摩未婚妻Fifi姐負責招呼佢哋，可見大家都好重視隻馬嘅進度。
至於「明月千里」，今課走勢亦唔錯，喺雷神胯下沿途居前列，末段好輕鬆保持位置，跑得第四名，已經有基本作戰水準。
「明月千里」身價一定唔平，來港前喺澳、紐攞到4冠4亞2季，贏過2100米二級賽愛沙妮冠軍錦標、2200米二級賽鷹園盃，亦係2200米一級賽昆士蘭打吡亞軍，長力同實力都有保證，絕對係大摩今季香港打吡大賽的重要武器。