環保組織地球之友近年多次出現高層人事變動，近期又再發生「大地震」。話說喺地球之友做咗26年、曾做過機構總幹事嘅老臣子劉祉鋒（圖），上星期已經低調地離任。
消息引發唔少揣測，有人懷疑事件係早幾年地記執行總監陳美玲突然請辭事件翻版，同地記董事局有人從中作梗有關，質疑老臣子其實「被辭職」。傳聞有地記前職員仲草擬緊「痛心疾首」公開聯署，譴責地記董事局管理有問題。
八方噚日搵過劉祉鋒，佢證實上星期已離職，但具體原因唔方便公開。佢話喺地記咁多年，由項目主任開始做起，一心想為環保出力，並唔係為名為利，往後都會繼續關心環保議題。至於地球之友方面，就未有回應事件。