早前「被退休」嘅前公務員事務局局長鄧國威，似乎已收拾心情，噚日去到石硤尾美荷樓同約100名學生分享成長故事同公務員生涯。
Paul鄧自言係土生土長香港人，喺基層家庭成長，出世後同父母及哥哥居於灣仔唐樓板間房，「要同三伙人一齊生活，亦都冇沖涼房，沖涼要自己煲水。」
雖然係咁，但佢話唔覺環境好差，反稱童年生活好開心，「嗰時冇電視機，要畀錢先有得睇，咁樣反而令屋企人之間關係更親，食完飯一家人傾吓偈」，相對𠵱家個個低頭對住電話情況好唔同。又提到當年冇人要求佢識樂器，考學校都冇乜問問題；而當年得兩間大學，為咗準備入大學，可以3、4日唔出街。讀男校嘅佢，自爆讀書時好內向，屋企有人嚟時會匿喺房，自從參加咗制服團隊紅十字會，學習社交技巧，先有機會識吓女仔。
Paul鄧畢業後第一份工喺太古做貿易，之後先入政府；為官37年，佢話「得多過失」，自稱好幸運，「我係少數找到自己興趣當工作」，寄語學生喺社會工作「唔好怕蝕底」。