葡萄牙球王基斯坦奴朗拿度（C朗）套紀錄電影《Ronaldo》禮拜一喺倫敦進行首映，呢位30歲皇家馬德里球星亦盛裝出席，仲着到成個占士邦咁，唔知仲以為佢參加緊《007》首映㖭。
C朗喺球圈人緣唔錯，所以球壇好多重量級人馬都有嚟支持佢，當中包括佢喺曼聯嘅恩師費格遜、前皇馬主帥安察洛堤、佢個超級經理人文迪斯，同埋盛傳同佢唔妥嘅車路士領隊摩連奴；當然唔少得佢屋企人，佢都帶埋媽媽同乖仔小C朗一齊嚟。身為主角嘅C朗梗係受到粉絲追捧啦，佢亦表現得非常親民，仲同班粉絲齊齊玩自拍。不過C朗嘅自拍方式亦與別不同，係馬拉松方式，粉絲排隊一個一個快閃上前，佢就不斷撳掣影相，而且足足自拍咗三分鐘㖭。睇嚟佢呢個C朗式自拍，應該可以掀起熱潮。