【扮靚籽：男女之間】
常言道，「女追男隔層紗」，但仍有很多女士面對心儀對象時，都會被動地等對方出手。以為女士只能乖乖做「獵物」，偏偏有一個交友app反其道而行，配對後只有女士才能展開對話，勢要女性做主導，到底這個新規則work唔work？訪問了創辦戀愛教室、以約會大師自居的美國NGH註冊催眠治療師劉奇諾（Kino），再經記者實試一個月後，發現女性主動的成功率相當高，原來只要掌握技巧，女追男一樣得。
根據配對網站match.com 2013年的調查，超過九成男士都歡迎女士先約會他們，但大部份女性仍不願意踏出第一步。「其實全世界嘅女士都較被動，但香港女仔就更加怕醜，唔好講做主動，有啲女仔連同男同事傾吓偈都驚其他人覺得佢嚟媾仔。」兩性專家Kino不時鼓勵他的女學生參加極速約會（speed dating），擴闊生活圈子，但都被拒絕，「好多香港女仔都覺得要隨緣，覺得去speed dating，上交友app識男仔違反自然。就算遇到心儀對象，如果對方冇表示，就覺得大家冇緣份。」其實女士只要踏出第一步，成功配對的機會便會大增。
友情定愛情 估估吓易動情
「就算個男仔一開始冇留意你，只要你多啲同佢講嘢，甚至約佢去食飯，佢都會諗『呢個女仔幾好喎』，所以你首先要製造機會畀大家多啲相處。」加上，香港男士普遍缺乏自信，女士主動踏出第一步可鼓勵他們行動。Kino建議，有心儀對象的女士不妨多點請教對方擅長的東西，因為多數男人心底都渴望被崇拜，只要讓他們表現自己，感覺自己被需要，便會對你加分。但千萬不要以為，只有靚女做主動才會成功，「外表只係入場券，如果要長遠發展，性格其實更加緊要。」因很少女士做主動，故男性會覺得主動出擊的女性有新鮮感，不過得來咁易，男士們又會否不珍惜？「講真，有時自己追返嚟都可以唔珍惜，當然你唔可以做到太出面，畀個男仔100%肯定你對佢有意思。」關鍵原來是要讓男士估估吓，感覺到你對他有興趣，但又不肯定你對他是友情還是愛情，「十五十六嘅心情反而會令個男仔更鍾意你。」
抱狩獵心態 只適用於炮友
現在online dating盛行，有空時除了用手機上facebook，便是打開交友app向左滑向右滑選對象，但我都極少主動和對象交談。我在這個由女性主導的交友app——Bumble（ios提供）中，和任職會計師的M先生談了幾句後，便約他出來吃飯。「我唔覺得主動約男仔呢個行為係飢渴嘅表現，反而我覺得好新鮮，好少女仔會咁直接。」不願上鏡的M先生說，不扭擰造作的女性最吸引，對於男人天性愛狩獵的說法，他就坦言，狩獵心態只適用於找炮友，如果要找長遠發展的對象，只要大家投契，並不介意由女方做主動。之後，我和另一位啱傾的工程師A先生，在app上交談了幾天，便主動問他拿電話號碼，其後更約他去行山，對於我積極進取的行為，他說：「其實好睇你約我去邊，行山係健康活動，所以唔會覺得你好隨便。」
找對象，性格合適最重要，誰做主動根本沒關係，不過太主動小心引起男士反感，A先生說：「試過有女仔約咗出嚟就叫我上佢屋企，呢啲我會唔鍾意。」很多人以為玩dating app唔正經，但我卻認識到幾位可以交心的正人君子，所以玩，都係要睇心態！
記者：陳 倢
編輯：黃仲兒
美術：利英豪