航空公司搞花臣，不外乎推出超平機票，或者搵知名食肆合作推飛機餐。港龍航空最近跟「百樂潮州」合作推飛機餐，其實佢哋早於2003年開始合作過，𠵱家係再度合作。
百樂潮州酒家行政總廚許美德指，雙方用咗3個月去研究菜單，佢特別介紹一道新菜式「黃金雞絲伊麵」。
佢話，潮州人以前見到全蛋麵，就只得一個煮法，就係整「糖醋麵」，不過將糖醋麵帶上飛機肯定會變腍。經過反覆思量，佢決定加入大量配料煮出呢碗類似燴麵嘅黃金雞絲伊麵。
華華噚日喺地面試食，食落濕濕哋，希望去到幾萬呎高空唔會變dry喇。
大家都知，飛機餐送上飛機前，有大量工序（在地面上完成打包、速凍、冷藏），再喺飛行過程中重新加熱，食物味道唔多唔少可能出現變化㗎嘛。
可惜呢個飛機餐只限於港龍部份航線（香港飛北京及上海浦東），亦只限頭等與商務艙，唔係人人有得試。