近日幾隻新股都非常有賣點，除咗市值800幾億嘅「零食王」達利食品（3799）之外，專做精神病醫院嘅溫州康寧醫院（2120），概念亦相當獨特。公司噚日搞上市發佈會指，中國精神病患者多達1.8億人（按全國13億人計，約佔14%），反映醫療需求非常急切。
𠵱家康寧有9間精神科醫院，提供逾2,000張床位，係國內私人精神病醫院龍頭。管理層好多都學而優則仕，董事長管偉立就係紅褲子出身，1987年起喺溫州市精神病院做臨床醫生；管醫生對病人就多，但似乎唔係好慣同傳媒交流，好多時將問題交波畀董事會秘書王健作答。
新股通常會設計紀念品，康寧呢份紀念品，睇落似藥丸，但又帶hi-tech感覺，叫做iPill，原來係一部膠囊型空氣清新機，真估佢唔到！