婦女動力基金噚晚為講述英國女人爭取平權嘅電影《女權之聲》（Suffragette），舉行慈善首映。英國駐港總領事吳若蘭、工黨何秀蘭同民主黨劉慧卿，仲有社運界女神碧樺依以及不時就時事不平則鳴嘅藝人葉蘊儀，都有着得靚靚現身捧場。另外佔中三子之中嘅戴耀廷同陳健民都有去捧場。呢套電影其實係描述20世紀初，英國社會存在制度化嘅性別歧視。面對住同工不同酬、無子女監護權等不公平狀況，一群不甘當奴隸嘅女性，決意為爭取平等權利，不惜走上街頭，犧牲一切亦要抗爭。