近期港足熱爆，人人撐港隊，連帶被封為「鐵血教練」嘅韓籍教練金判坤都備受關注。之前就有網民發現，Kim Sir側面睇落好似民主黨區諾軒，網民仲笑問係咪失散兄弟。
最近一個網上專頁「Picssage Cap圖鍵盤」，就真係搵咗區諾軒拍短片扮Kim Sir為港隊打氣，仲要專影佢嘅側面，驟眼睇落真係好似。
八方睇過條短片嘞，片中嘅「Kim Sir」十分嘮嘈，喺場邊嗌球員「don't pass to him」，又叫人「着襪着快啲」，非常搞笑，最後就用「Kim Sir」把口，同港隊講句：「你哋全部都得㗎喇，贏硬！」八方問番區諾軒，佢話其實用咗一兩個鐘拍攝，憑住之前睇波對Kim Sir嘅認知去做，相信對方平時應該唔會咁教波喎。
區諾軒係南區利東一區選候選人，對手包括李嘉盈同黃潤基。