「前輪后」趙海珠（Alison）上星期喺facebook宣佈喜訊，話陀緊第二胎，已經有咗4個月，噚日華華終於可以當面同佢講聲「恭喜」。唔知係咪Alison着住黑色連身裙，華華又唔覺得好見肚，不過Alison自己就笑住話「已經好大個肚」。
Alison婚後其實可以做少奶，不過佢都有兼職賺錢，𠵱家逢星期一至五早上返dbc數碼電台做財經節目，平時又會接吓記者會主持、產品代言人等工作。
友邦強積金噚日就搵Alison做記者會主持，順便想佢分享自己嘅理財心得。點知Alison話，作為一個半職媽咪，下晝返到屋企要陪阿仔玩，遲吓仲要教阿仔做功課，仲邊有時間去打理自己嘅退休計劃吖。佢講到真係無能為力咁喎。