裕泰興創辦人「九叔」羅肇唐嘅二子羅守輝，一向都鍾意投資物業，多數儲貨收租，好少沽貨。不過佢近排就真係好積極沽貨，繼早前賣出寫字樓與工廈單位，最新又以5,000萬元，沽何文田窩打老道一批舖位。
羅守輝剛賣出何文田窩打老道66號寶建大廈地下B、C舖同地庫，共8,000方呎。舖位現時租畀寵物酒店，月租15.7萬元，租期至2022年，回報約3.8厘。
上址原本係車庫，包括10個車位在內，羅守輝買入後就打通佢，以舖位方式出租。羅守輝喺2008年以1,480萬元買入，持貨7年勁賺3,520萬元。
羅守輝今年已經先後賣出觀塘海濱中心工廈與銅鑼灣萬國寶通中心單位，連埋呢批舖，半年內套現3億元。