香港有影帝為部戲增肥幾十磅，又有為部戲去學MMA練到一身肌肉，皇家馬德里前鋒基斯坦奴朗拿度（C朗）呢？為咗個人自傳式電影《朗拿度》上周全球首映，佢老哥四處宣傳，又挑起美斯火頭，又暗示想返曼聯，分心之下搞到狀態低迷，周日西甲聯賽作客2:3不敵西維爾，C朗冇波入之餘全場只得一球中框射門，搞到「銀河艦隊」喺國家打吡前輸波，落後宿敵巴塞隆拿三分。
2:3負西維爾賓帥首敗
C朗上周頻頻見報講東講西，無非都係為部戲，上周中歐聯主場對巴黎聖日耳門，佢已經交白卷兼全場只有一次禁區內觸球，周日作客西維爾就繼續沉。講真，西維爾嘅比斯桑球場真係強隊凶地，之前已經贏過巴塞隆拿，今次對皇馬都未驚過，雖然皇馬隊長沙治奧拉莫斯打個靚車身，幫球隊先開紀錄，但就整傷膊頭要退下火線，皇馬冇咗呢個後防大佬，防線當堂冇開季咁勁，西維爾就靠恩莫比尼、班尼加同洛蘭迪各建一功反超前，皇馬靠占士洛迪古斯完場前入波，追成2:3，但都係輸波，亦都係賓尼迪斯接手後首場敗仗。
C朗今場波踢足90分鐘，但全場只得五次射門，而且只有一次中框，交白卷之餘仲躁躁地，一次反擊更疑似揮拳打向西維爾中場基祖華克，好彩球證睇漏眼。西班牙傳媒就當然向C朗發炮，《阿斯報》就踩C朗：「C朗在球場表現黯淡無光。」
C朗全場得一次中框
皇馬下一場就要主場對巴塞隆拿，合演國家打吡，大戰前輸波已經唔係好兆頭，沙治奧拉莫斯因傷已經退出國家隊比賽，趕唔趕得切復出都成疑問。不過咁，不過輸波兼失榜首位置，都冇影響C朗，因為國家隊獲准免役，佢就飛去倫敦做新片宣傳，真係緊張過比賽。
皇馬失分，最開心就係巴塞隆拿，巴塞同日3:0大勝維拉利爾，領先皇馬三分，尼馬又入兩粒，不過小風波係呢位巴西前鋒想戴頭帶比賽，結果不獲球證批准。
