《南華早報》嘅新聞一波未平，一波又起。繼極之喜歡梁振英施政嘅《南早》副老總譚衛兒，將於明年1月坐正做老總後，市場又有傳出，內地富豪馬雲嘅阿里巴巴正討論入股《南華早報》，日前另有傳聞指，今次收購唔排除係全面收購，令馬雲將成為《南早》嘅新老闆，現時大老闆郭鶴年家族將逐步退出。八方問過阿里同《南早》發言人，兩邊都不評論，大家對呢啲傳聞都係聽住先。
之不過冇正面回應，唔等於《南早》嘅員工冇反應。江湖傳聞，《南早》唔少人對日讚夜讚CY嘅譚衛兒極有保留，士氣甚低落，家吓仲傳出內地第二首富馬雲入股？《南早》編輯同記者又點會唔擔心日後編採方向呢！《南早》近日多個部門流失情況嚴重，公司仲未請番人填補。對《南早》嚟講，呢個秋天名副其實多事之秋。