昨日講及貪腐國情，深入中國各階層，實不知如何整理，現在習近平強力打貪腐，不少大老虎落馬，國企高管受雙規或雙開，豈止殺雞儆猴，直情係殺獅子鎮壓狐狸狼狗。
呢日同近年活躍於內地投資項目嘅朋友R及其他人吃午飯，食食吓，睇吓手機新聞，知道有人死在柳州，亦云慘矣。朋友R話：「唓，慘乜鬼呀，俗語話住在杭州，食在廣州，死在柳州。有乜咁慘啫。」慘在係墮河而死呢，而且墮河原因不明，呢位死者叫做肖文蓀，係柳州市委副書記兼市長，十一月四日上午參加市委會議，晚上十時就不知何故，墮河而死，情況與一間國企嘅紀律檢查小組人士突然在辦公室死亡，差不了多少。呢類死亡事件，似乎逐漸增加，與反貪腐有無關係呀？
朋友R要飲杯茶，消化半刻之後先至再講：「我在內地搞項目投資，與不少市長、副市長、書記、副書記及當地富豪打過交道，講生意首先要拉關係，我最近就因為咁得罪咗成個集團嘅人，累我受拍拿怨言！」
朋友R交際手腕好，公關一流，點會得罪人呀？講落原來同香港價值有關，中環專業人士多數有操守有原則，會申報利益，佢因為前年受一間學校選為校董會主席，係百分百「無償義工」，因學校有名氣，不少人以為識得主席就可送子女入學，猛咁請朋友R食飯，朋友R梗係叫佢哋循正途申請，考口試筆試，收生由校長及收生委員會決定，唔關佢事。香港朋友嘅子女入唔到，最多怨幾句，點知有大陸富豪知道後，就話肯與佢合作搞投資，跟住就話想佢保送兩位細路入學，朋友R心知不妙，立即搵嗰兩位細路見吓面講吓英文，一講就知考試百分百肥佬，建議佢哋搵補習先生。富豪好豪氣，直情送細路到英國讀咗幾個月英文，返嚟再考，結果係面試筆試都追唔上水平，被拒入學，大陸富商於是指朋友R唔俾面，身為校董會主席，都唔用自己影響力，護送細路入學，朋友R與富豪因此反面，在某城市投資項目亦因此暫時作罷！左丁山問佢：「你個主席位做到幾時呀？」朋友R話：「好彩已經夠鐘落莊，否則呢個位會為我帶來更多敵人，失去更多朋友，內地富豪好多有合法途徑在香港攞到身份證，搬埋大婆落嚟為兒子、姪女搵埋學位，煩死我呢類人呀！」係吖，習近平打貪腐，但幾時有法子清除中國同胞喜走後門嘅心態？
昨日〈貪腐國情〉一文，文中指「中信證券高層自殺」，應為「國信證券高層自殺」，特此更正。