香港珠寶設計師、嘉頓新抱張王幼倫早年創立獨立珠寶品牌Carnet，融和東西方美學。今年英國殿堂級Masterpiece Fair，品牌一件以唐三彩為靈感的作品，被《英國郵報》選為十大必看，張王幼倫對此說：「我認為喺唔同文化撞擊下，就會成就獨一無二嘅設計。」
嘉頓新抱兼珠寶設計師張王幼倫設計珠寶近30年，創立的品牌Carnet今年在以古董為主的Masterpiece Fair展出一件翡翠、綠寶頸鏈，令英國傳媒大為驚艷，張王幼倫早前受訪時對此說：「我哋好幸運搵到一組靚到驚人嘅彩色翡翠，我諗起中國唐三彩，一望就感受到個氣氛，係嗰種中西融合嘅美，所以決定做一條顏色對比柔和、大膽嘅頸鏈，雕成葫蘆形翡翠寓意幸運，也呼應作品中嘅中華文化。」
從個人出發
雲紋、古代窗花，以至西洋水晶吊燈、古典神話的禁果，自然界的枯葉、浮雲都是張王幼倫的主題，中西藝術、人文大自然，全是靈感來源，「作為一個設計師，你要睇到自己角度，唔會突然到『我要搵啲中國嘢』，咁唔work，反而你隨時隨地睇到，有時係一種顏色，有時係一個線條，再啟發你點樣去演繹、去延伸，或者有些事物係睇完埋藏喺心中，突然間又走番出嚟。」
張王幼倫特別鍾情中式優雅意趣，「中國歷史長遠，珠寶發展係稍遲，但中國設計例如陶瓷、圖案、線條，五千年來有好多可以擷取靈感，你睇明代傢俬，簡單線條但又有細節。」
手做是文化
喜見近年多了不少年輕、獨立的女性珠寶設計師，但面對電腦協助繪圖、新式製作的珠寶，張王幼倫卻堅持用最傳統的人手工藝，「𠵱家好多machine，好多時就方便，部機適合做乜，你就會就住做；但我唔鍾意俾嘢限制，點表達就點做，我鍾意最傳統人手做，因為代表一份文化同歷史。」
採訪：林妙萍
攝影：陳志嵐
示範：Frances Liu of Style
化妝、髮型：Becky Kwan of Wendy's workshop
服裝提供：Escada
場地提供：四季酒店