特首梁振英蓄勢待發爭連任，梗係要有啲甜頭畀大家，以令選票袋袋平安。而勞工階層向來都係佢爭票對象，又難怪佢都要落實2012年特首選舉政綱中，有關逐步取消強積金對沖嘅承諾嘅。但觸及工商界利益，難度一定好高，花生友聽聞，唔只工商界，連政府財金系官員都對此好大反彈，先搞到CY另覓渠道，將個波交畀勞福局局長張建宗跟進。
有政界中人話呀，CY早前喺一個內部會議提過逐步取消MPF對沖後，即刻有人將消息漏畀傳媒，繼而工商界嚟個誓死反對大合奏，梁班子中似乎有人都唔贊成呢個建議，想爆出嚟後「見光死」。有知情人士話喎，梁營覺得財金系官員係疑犯，質疑唔通財爺曾俊華同財庫局局長陳家強從中作梗？至令上年搞唔成、今年亦提早曝光，只想爛尾收場。
林鄭 張建宗 較聽話
嗱嗱嗱，當外界都睇到財爺同CY不咬弦，當事人又點會感受唔到？有梁營聲言CY肯定都知曾俊華唔會幫佢搞，為免節外生枝，所以諗咗一條橋，就係將成個議題轉移畀可信任嘅官員跟進。大家冇留意咩？扶貧委員會喺12月就退休保障進行為期6個月嘅公眾諮詢，會一併諮詢MPF嘅退休保障功能，知情人士話喎，扶委會係政務司司長林鄭月娥同勞福局局長張建宗話事，佢哋對CY嘅反抗度冇咁大，而且社福方面無財金系官員咁「手緊」，係理想交託人選喎。
花生友
周二、四刊出