多蒙特同史浩克04喺前晚場德甲魯爾區打吡合演入球騷，前者最後險勝3:2，家陣12戰得29分排第二位，繼續力逼12戰得34分嘅榜首球隊拜仁慕尼黑。奧巴美揚喺47分鐘射成3:1後除衫慶祝，騷佢件印有蝙蝠俠標誌嘅黃色底衫畀大家睇，結果硬食一面黃牌。連對運動鞋都有蝙蝠俠標誌嘅奧巴美揚咁話：「呢場打吡真係好難打，我好開心我哋可以贏波。之前我同馬高列奧斯喺入波後扮蝙蝠俠同羅賓慶祝。馬高列奧斯同我情同手足，呢場波佢因傷缺陣，所以我喺入波後騷個蝙蝠俠標誌出嚟，將個入波送畀佢。」
被問到係咪好鍾意蝙蝠俠，呢個加蓬前鋒咁話：「我好喜歡呢套電影。有一晚我同馬高列奧斯出街食飯，大家傾開入完波就咁用啲簡單動作去慶祝真係幾悶，於是決定搞搞新意思，希望可以玩得激少少。」除咗蝙蝠俠之外，奧巴美揚之前入波後亦試過扮蜘蛛俠慶祝。