【英超花絮】禮拜日場北倫敦打吡雖然和氣收場，但熱刺球迷見到球隊俾人追番，就似乎唔多順氣，喺阿聯酋球場嘅廁所搞破壞，打爛啲洗手盆（上圖）。刺迷整爛人哋啲嘢係唔啱，但網民就話唔怪得佢哋咁做，因為早兩個月阿仙奴作客熱刺嗰陣，班槍迷就將人哋白鹿徑啲橫額拆晒落嚟，一樣冇品！不過咁樣以怨報怨唔係辦法，好心球會就出句聲，勸吓啲球迷啦！
另外，喺呢場打吡戰前，阿仙奴透過社交網站發佈出場陣容，點知擺個大烏龍，11個正選同七個後備全部都係養緊傷嘅阿歷士張伯倫（下圖），真係笑死人！錯得咁明顯，兵工廠方面都好快留意到，之後出番一個正確嘅陣容。張伯倫之前喺英聯盃對錫周三場波觸傷腿筋，最快要喺國際賽期後先至可以復出。