立法會主席曾鈺成（圖）講嘅嘢，真係少啲深度都好難明嘅。噚日佢喺報章撰文，就由市花講到去殖化，都令人議論紛紛。
題為〈香港紫荊〉嘅文章，指中國紫荊花同香港洋紫荊係有分別㗎喎。曾鈺成話洋紫荊喺1965年獲定為香港市花，區旗同埋區徽設計都係採用洋紫荊圖案，最後與《基本法》同獲全國人大通過。
話區旗區徽不合憲
但曾鈺成話喎，《基本法》指區旗同區徽上嘅圖案係紫荊花而非洋紫荊，「或許是要去殖民化」，但強調「這樣一來，特區的區旗和區徽便不符合基本法」。
佢話港人咁like洋紫荊，唔係因為佢呢個「洋名」，而係因為佢適應香港環境兼且生長得繁盛，「不管給她換個甚麼名稱，她仍是港人熟悉和喜愛的洋紫荊」。
文末特別提到：「若破壞了她生長的環境和條件，便會變質、失色、枯萎」，唔通係暗批要搞去殖民化，都唔可以矯枉過正？