今屆區選焦點男新人王，黃大仙龍星選區林作肯定上榜，皆因佢有個十優狀元港姐做女友，人氣極盛。身為大律師嘅佢，既有才子陶傑撐場、亦有資深大律師清洪師傅嘅推薦，但林作卻喺日前向選舉事務處呈交清洪撤銷對佢支持嘅同意書，並申請修改網上嘅候選人簡介，最新版本遮住咗清洪個名，只得陶傑。有地區人士質疑，唔通林作係老作，亂吹獲師傅撐？抑或兩師徒最近反咗目？
八方問過林作，佢話查實清洪代表緊佢對手、即係爭取連任嘅譚香文打緊官司，唔知師傅係咪冇為意呢一點，但為免利益衝突，所以先主動申請撤銷推薦咋。譚香文就話，清洪忽然由支持變唔支持，「呢個問題，明眼人一睇就知點解」。同區候選人仲有岳敬寬同何偉權。