創科局上周五喺立會財委會主席陳健波（圖）「剪布」下通過撥款申請，20號成立，唔少人批評佢唔畀議員提修訂，但陳噚日喺電台節目堅持依法辦事，仲話好似梁國雄咁蠱惑嘅人都未能覆核，證明剪布有依據，仲批評香港選舉制度畸形：「佢（候選人）可能2萬票3萬票已經（當選）得啦嘛。」
3萬票唔算多，但由保險界功能組別陳健波講出嚟有啲諷刺，皆因佢2012年0票自動當選，但佢叫外界唔好低估功能組別：「你試吓去保險界選吖，百幾間公司，全部行政總裁嚟嘛，佢哋好清楚邊個做嘢點。」
睇番資料，有份就創科局拉布嘅長毛喺2012年立會選舉有48,295票，人力陳偉業、陳志全同獨立黃毓民得票亦多過3萬，反而工聯會王國興只得27,336票，唔通陳健波係笑盟友？王國興係區選小西灣區候選人，對手有朱日安同譚得志。