華懋集團噚日喺大埔大美督舉辦「華懋行2015」，稱有超過3萬人參加，籌得善款將全數捐予世界綠色組織。特首夫人梁唐青儀原定出席，但唔知點解冇現身；至於另一嘉賓港大校委會前主席梁智鴻，主持完起步禮後就急急腳走，記者搵佢好耐搵唔到。
同場的食物及衞生局局長高永文就依舊笑住同人影相，仲接受咗一個「獨家訪問」。話說起步禮開始前，有一位細路女扮記者訪問民望高，問佢鍾意做局長定係醫生，點知民望高就笑住咁話鍾意做醫生多啲，但既然𠵱家做緊局長，咁就惟有「做住先」。前特首曾蔭權當年話「我要做好呢份工」，今日民望高就有新版本「呢份工做住先」，不過「做住先」嘅心態都可以有咁高民望，肯定恨死嗰個事事「迎難而上」嘅上司啦！