上周六亞冠盃決賽首回合賽事，力爭繼2013年後再奪冠嘅FC廣州（恒大），作客阿聯酋嘅阿爾阿里踢成0:0平手，兼有前鋒列卡度高拉特受傷退下火線。呢位進攻主力可唔可以趕得切喺兩星期後嘅次回合賽事候命仲係未知之數，加上陣中有九位球員要返國家隊備戰國際賽，對備戰次回合肯定有影響，教練史高拉利（大菲）都幾頭痕。
高拉特膝傷難樂觀
場波賽前已經出現小衝突，兩架載有持票中國球迷嘅大巴，被球場保安拒絕入場，之後中國球迷落車抗議，竟然被在場警察打兼拘捕。阿爾阿里仲有其他小動作，喺中場休息嗰陣喺自己一方後場灑水，多少對恒大嘅進攻有影響。喺今屆亞冠入咗八球仍然領先射手榜嘅恒大前鋒高拉特，喺59分鐘被對手鏟跌，膝部受傷被迫退下火線。賽後史高拉利對佢可唔可以趕及喺21號返主場嘅次回合決賽候命，唔係太樂觀：「佢膝頭腫得好犀利。」不過「大菲」亦指出：「今場波我哋嘅表現唔多好，到次回合仲係踢成咁，要贏冠軍就好難。」
距離次回合只有兩星期，不過包括隊長鄭智等一共九個球員隨即要暫時離隊，返所屬國家隊準備國際賽，其中班中國國腳就要踢埋「11‧17」港中大戰先可以歸隊，亞冠決賽安排喺呢啲時間上演其實都好奇怪，史高拉利都好冇癮咁話：「次回合我哋會作出調整，但一切都要等班國腳返嚟再算。」
從數據上嚟睇，恒大爭標仍然樂觀。自02年改制為亞冠盃開始，過去12屆決賽有八次係用主客場兩回合賽制，一共出現過三次首回合和波，結果全部由次回合返主場嗰隊贏冠軍。
